حدها متين الحرابة

كامل عبدالماجد

الحمام الفر جافل
امتي يرجع ليكي قافل
والسلام من تاني يقدل في رباكي الحلوة رافل
****
يا عرين اهلي البواسل
ما عرفنا الفيكي حاصل
الجيوش تزحف حيالك
جيش يفوت والتاني واصل
والاذاعات بيكي ترطن
من صباح لي ليل تواصل
والوفود قاصداكي تتري
فيكي تفتي وفيك تفاصل
والحمام الفر جافل امتي يرجع ليكي قافل
****
يا عرين أهلي الكرام
البعشوا الضيف نعام
البشيلوا الليل قيام
الزمان جلجل هديرم
وساروا في جيش الإمام
والزمان دفقوا العطايا
ودثروا البيت الحرام
يا سلام أنا يا سلام
كيف أفل بالله نجمك
وصرتي في الآخر حطام
والحمام الفر جافل امتي تاني يجيكي قافل
****
ياعرين أهلي الطيابة
حدها متين الحرابة
الدمار ماخلا حلة
والحريق ما خلا غابة
عشعش البوم في طلولك
والبيوت صبحت خرابه
والخيام صبحت ملاذ ك
بي جحيمة وبي عذابة
كيف تعيشي علي الإغاثة
وكنتي للوطن السحابة
كافي خيرك ويكفي غيرك
ليكي شنة وليكي رنة وليك مهابة
هل كبارك شتوا فاتوا وسدت الجودية بابة
والحمام الفر جافل هل بعود ليك تاني راحل